عزومه

موضوع: عزومه الخميس سبتمبر 10, 2009 12:46 pm

اليوم معزومين عندنا اعضاء المنتدي

نقدم لكم اول حاجه المكرونه المطبوخه

[ندعوك للتسجيل في المنتدى أو التعريف بنفسك لمعاينة هذه الصورة]

المقادير والطريقة

كيلو لحم حولى صغير - 5 بصلات حجم كبير مقطعة شرائح 2/1 كيلو حمص منقوع طماطم حكيه - فلفل أخضر -طماطم أخضر - مكرونه مبوخه وزيت زيتون
نحط الطنجرة على النار وفيها شوية ميه ونحط فيها اللحم والبهارات والطماطم الحب والحكيه والزيت ونحط الكسكاس فوقها ونحط فيه البصل والحمص يتبوخ ونتركهم حتى يستوو
وبعدما يذبل البصل ويستوى الحمص نحطوه فى طنجرة ونكسرو المكرونه المبوخه ونرشوها بالزيت ونحطوها تبوخ
ونجو للبصل والحمص نخلوه يقلى شوية ونحطو علية بهارات وملح وقرفة وملعقة طماطم حكيه ونخلية يغلى شوية على النار ونحط عليه شوية مرق من الطنجرة ونخلية على جنب
نجى للمكرونه بعد ما تتبوخ نقلبها فى قصعه ونسقيها بالمرق ونحط عليها ماء زهر وشوية زبدة وقرفة ونردوها تكمل الاستواء
وبعدما تتسوى جيداً نحطوها فى طبق التقديم ونسقوها بالمرق وبعدين نحطو عليها التقليه ونحطو اللحم من فوق والفلفل المقلى ..
-------------------------------------------------------------

وثانى حاجة العصبان

[ندعوك للتسجيل في المنتدى أو التعريف بنفسك لمعاينة هذه الصورة]

المقادير والطريقة

كسبر - معدنوس- بصل أخضر - شبت - كبدة خروف- لحم مفروم -بهارات - رز - شوية نعناع - ومصارين خروف
بعد ما ننضف المصارين جيداً ونغسلهم بالليم والملح والخل
يكونن جاهزات للحشى
بأخذ جميع المقادير ونحلطها مع بعضها ونحشى بيها المصارين نحطهم فى طنجرة ميه على النار حتى تستوى وبعدها نحطهم فى الكوشة يتحمرن ..
-----------------------------------------------------------

وثالث حاجة البطاطا المبطنه

[ندعوك للتسجيل في المنتدى أو التعريف بنفسك لمعاينة هذه الصورة]

المقادير والطريقة

بطاطا مقطعة شرائح ومفتوحة من الوسط لحم مفروم شوية كسبر بيض خبزة مطحونه ملح بهارات بصل - ثوم
نأخذ البطاطا بعد ما نجهزها وننقعها فى مية وملح ونتركها جانباً
ناخذ البصل والثوم ونقليهن ونحط عليهم اللحم والبهارات حتى يستوى ونحط الكسبر
ونحشي البطاطا ونغمسها فى البيض والخبزه ونقليها
----------------------------------------------------------
ورابع حاجه العجــــــــه

[ندعوك للتسجيل في المنتدى أو التعريف بنفسك لمعاينة هذه الصورة]

المقادير والطريقة

بطاطا مقطعة مربعات ومقلية - كسبر ومعدنوس وبصل وفص ثوم 3 دحيات ظرف بيكنج بودر 5 ملاعق دقيق شوية زيت ملح بهارات
كوب حليب
تخلط جميع المقادير ونصبها فى طاجين وندخلها الفرن حتى تستوى وتقطع مربعات
-----------------------------------------------------------

وأخيراً بعد تجهيز الاكلات نضعها مع بعضها وطبعاً مننسوش الصلطة والمصير وهذى الصفره جاهزة

تفضلوا معانــــــــــــــــــا
[ندعوك للتسجيل في المنتدى أو التعريف بنفسك لمعاينة هذه الصورة]

أهديها الى صديقتى الغاليه أم مفتاح وزوجها واولادها فى اميركا

انشاء الله تعجبكم
صحتين وعافيه
تحياتـــــــــــ قمينس